بالرغم من ان عيد الفطر المبارك عيد خاص بالمسلمين الا ان العادي و الطبيعي في مصر انك تلاقي المسيحين فراحنين بالعيد زي المسلمين و تلاقيهم بيطالبوا قبل العيد بيومين باجازة غير رسميين استعدادا للعيد !! بيجيبوا هدوم جديدة و يخرجوا و يطرقعوا و كل حاجة و كأنه عيد قومي مش عطلة رسمية وبس بالنسبلهم يعني
الغريب كمان ان المسلمين اومعظمهم يعني بيتضايق جدا من اي واحد مسيحي يشرب سيجارة جهارا في نهار رمضان او يضبط متلبسا بكوباية شاي على الصبح او بق مية و كأننا بنطالبهم بالصيام معانا طالما هيعيدوا معانا .. امال هيعيدوا ببلاش !! .. لكن الشهادة لله معظمهم ان لم يكن اغلبهم بيحترموا ده جدا لدرجة تغيظ .. دا انا حتى بشوف ناس مدمنين تدخين مسيحيين طول رمضان و لا سيجارة .. عجيبة فعلا
اعتقد ان ده راجع لان طبيعة الشعب المصري بتصهر كل و اي معتقد او ثقافة تقابلها و تضمها بطريقته لمخزونهامن المعتقادت .. عشان كده ثقافة الشعب المصري مزيج عجيب جدا من كل حاجة مرت عليه من ايام الفراعنة الي الآن
كل سنة و كلنا طيبين مسلمين و مسيحين .. كلنا مصريين
1 comment:
على الرغم من اختلاف الديانات بس اوقات بيكون المسيحي صادق في مشاعره اكثر من صديق مسلم
كل سنة وانت طيب
Post a Comment